Kryesia e Aleancës për Shqiptarët ka vendosur njëzëri të japë dorëheqje kolektive, pas një debati konstruktiv dhe demokratik në mbledhjen e saj të fundit, në prag të mbajtjes së Kuvendit dhe Kongresit partiak, informon PressOnline.al
Sipas njoftimit zyrtar, ky vendim është marrë me bindjen se partia ka nevojë për freski organizative, përfshirje të kuadrove të reja dhe reforma të thella e gjithëpërfshirëse, të cilat synojnë forcimin e mëtejmë të profilit politik dhe funksionimit të brendshëm të Aleancës për Shqiptarët. Vendimi vjen gjithashtu si reflektim ndaj rezultatit të zgjedhjeve lokale.
Deri në mbajtjen e Kuvendit dhe Kongresit partiak, drejtimin e partisë do ta ushtrojë kryetari i Aleancës për Shqiptarët, z. Arben Taravari, ndërsa Kuvendi i Partisë do t’i konstatojë zyrtarisht dorëheqjet e Kryesisë.
Sipas afateve statutare, Kuvendi i Partisë pritet të mbahet në mesin e muajit shkurt, ndërsa Kongresi i Partisë do të organizohet më së voni deri në vjeshtën e këtij viti.
Nga Aleanca për Shqiptarët theksojnë se partia mbetet e përkushtuar ndaj parimeve të demokracisë së brendshme, reformimit të vazhdueshëm dhe përfaqësimit dinjitoz të interesave të shqiptarëve.
