Vetëm pak ditë pasi paralajmëroi se Komuna e Butelit do t’i dalë në ndihmë qytetit të Gostivarit për shkak të krizës me furnizimin me ujë, kryetari Darko Kostovski ka bërë të ditur se ndihma tashmë është realizuar.
Sipas njoftimit të publikuar nga Kostovski, donacioni prej 22 tonësh ujë të pijshëm ka mbërritur në Gostivar dhe do të shpërndahet për qytetarët që po përballen me mungesën e ujit.
“22 tonë ujë i pastër ka mbërritur në Gostivar”, ka shkruar Kostovski, duke konfirmuar realizimin e premtimit të bërë disa ditë më parë.
Kostovski gjithashtu ka falënderuar të gjithë këshilltarët dhe kompanitë me përgjegjësi shoqërore nga Komuna e Butelit që kontribuan në sigurimin e kësaj ndihme humanitare.
Ky donacion sipas Kostovskit synon të lehtësojë situatën e qytetarëve të Gostivarit, të cilët prej ditësh po përballen me vështirësi në furnizimin me ujë të pijshëm.
