Kryetari i Komunës së Butelit dhe njëherësh kandidati i VMRO-DPMNE-së për mandatin e dytë, Darko Kostovski, ka njoftuar për hapjen e një mega parku të ri në lagjen Radishan, projekt ky që ishte një nga kërkesat më të mëdha të banorëve për dekada me radhë.
Sipas Kostovskit, parku i ri shtrihet në një sipërfaqe prej 10.000 metra katrorë, ndërsa përfshin një shesh të madh dhe shtigje për këmbësorë me hapësirë prej 4.000 m², si dhe një kënde lojërash modern për fëmijët me pajisje bashkëkohore dhe dysheme të butë për siguri maksimale.
Gjithashtu, parku është i pajisur me ndriçim modern LED, sistem të posaçëm ujitjeje automatike, dhe 6.000 m² gjelbërim që i jep hijeshi të veçantë hapësirës.
“Bashkëqytetarët e mi morën më në fund atë që e prisnin me dekada. Jam i bindur se ky do të jetë vendi i ri qendror i Radishanit, ku të gjithë do të mblidhemi dhe do të shoqërohemi,” ka shkruar Kostovski në postimin e tij në Facebook.
Vlera totale e projektit arrin në 19.993.529 denarë, ndërsa Kostovski theksoi se Komuna e Butelit “do të vazhdojë të krijojë të ardhme përmes veprave që qytetarët i meritojnë.”
