Shkup, 15 janar – Sipas një hulumtimi të Qendrës për Komunikim Qytetar (QKQ), për dekorimet e Vitit të Ri 2025, komunat e vendit kanë shpenzuar 785 mijë euro. Përgatitjet për dekorimin e festave për vitin e ri 2026 kanë përfshirë procedura tenderi nga 36 komuna, ndërsa 31 nga këto 36 komuna kanë dorëzuar të dhënat për kontratat e nënshkruara për dekorimin tek Zyra për Prokurime Publike.

“Hulumtimi tregon se tenderët për dekorimet e Vitit të Ri kryesisht janë zhvilluar pa konkurrencë. Numri mesatar i ofertave për një tender është vetëm 1,15, shumë më pak se minimumi i rekomanduar për të siguruar konkurrencë në treg. Në 27 nga 32 tenderët e zhvilluar është dorëzuar vetëm një ofertë. Vlera e kontratave ku është dorëzuar vetëm një ofertë arrin deri në 91%. Mungesa e konkurrencës vë në dyshim realizmin e shpenzimeve për dekorimin”, theksohet në studimin e Qendrës për Komunikim Qytetar.

Nga 32 kontratat e nënshkruara për dekorim, 15 janë me kompaninë “Link Media Plus” në vlerë totale prej 615.052 eurosh. Dy kompani të tjera kanë arritur të fitojnë më shumë se një kontratë: “Dimenzija 360” nga Shkupi për tre komunat jugore – Valandovë, Gjevgjeli dhe Dojran, si dhe kompania “Green Way” nga Manastiri, e cila përveç me Komunën e Bitolës, ka nënshkruar kontratë edhe me komunën e Prespës.

12 kompanitë e tjera që kanë nënshkruar kontrata për dekorime të Vitit të Ri kanë fituar vetëm nga një kontratë secila.

Komuna që ka shpenzuar më shumë për dekorimet e Vitit të Ri është Shkupi, duke nënshkruar kontratë me kompaninë “Link Media Plus” nga Shkupi në vlerë prej 81.276 eurosh. Pas saj renditet qyteti i Shkupit, me kontratë të nënshkruar me të njëjtën kompani në vlerë prej 69.457 eurosh.

Nëse te shpenzimet e qytetit të Shkupit shtohen edhe shpenzimet nga komunat e tjera shkupiane (Qendër, Çair, Butel, Gazi Baba, Gjorçe Petrov dhe Karposh), del se për dekorimet për pritjen e Vitit të Ri janë shpenzuar 284.904 euro. Kjo është më shumë se një e treta e të gjitha parave të shpenzuara për dekorim në vend.

Përveç qytetit të Shkupit, të gjashtë komunat e tjera të qytetit gjithashtu kanë nënshkruar kontratë me kompaninë “Link Media Plus”.

Nga perspektiva e numrit të banorëve, rezulton se Shtipi ka shpenzuar 111 denarë për banor për këtë qëllim, ndërsa qyteti i Shkupit vetëm 8 denarë për banor.