Zëvendëskryeministri i parë, Bekim Sali në intervistën për “ZOOM” në TVM2 lidhur me Kodin zgjedhor ka thënë se përderisa nuk është shtruar kjo deri te çdo faktor politik që të diskutohet rreth një teme të caktuar, gjithçka është e hapur.
Sipas tij, madje VLEN është për gjithpërfshirje të të gjitha etnive dhe grupeve që jetojnë në vend tonë.
“Kompromise dhe zgjidhje mund të gjenden, pasi ne nuk jemi të prerë për një model i cili mund të jetë më i mirë dhe tjerët s’bëjnë, përkundrazi te të gjitha modelet mund të gjenden elemente që i konvenojnë njërës ose palës tjetër. Në parim VLEN është për gjithprfshirje të të gjitha etnive dhe grupeve që jetojnë në vendin tonë. Gjithpërfshirja, nënkupton mirëqenie etnike apo sociale në vend, duhet të dëgjohet zëri i secilit në Kuvend, kërkesa e të gjitha etnive që kontribuojnë në vendin tonë”, ka thënë ai.
Ai këtu ka përmendur edhe pjesëmarrjen e diasporës gjatë procesit zgjedhor si aspekt të rëndësishëm.
“Një element që dua ta cekë është pjesëmarrja e diasporës gjatë procesit zgjedhor e cila për fat të keq në forma të ndryshme është izoluar. Sot ajo mund të votojë ashtu siç ka bindje pasi ata jetojnë dhe kontribuojnë në ngritjen dhe zhvillimin e këtij vendi. Vota dhe kontributi i saj në te ardhmen do të jetë shumë i rëndësishëm dhe e përkrahim këtë iniciativë, është një nga propozimet tona që mund të shtrohet në ndonjë debat që mund të hapet mes faktorëve politik në të ardhmen”, ka thënë zëvendëskryeministri Sali.
Burimi: alfax.mk
