Kina prezantoi superkompjuterin e ri zhvilluar në vend ditën e Mërkure për të cilin agjencia shtetërore e lajmeve Xinhua thotë se është disa herë më i shpejtë se versioni i kaluar.
Superkompjuteri i quajtur “Tianhe Xingyi” u prezantua në Qendrën Kombëtare të Superkompjuterëve në Guangzhou ndërsa Xinhua nuk dha detaje rreth fuqisë që ka.
Por sipas një raporti i cili citon Lu Yutong, drejtorin e qendrës, kompjuteri ri ka tejkaluar në performancë Tianhe-2, një prej superkompjuterëve më të shpejtë të Kinës.
Tianhe-2 është zhvilluar nga Universiteti Kombëtar i Teknologjive Mbrojtëse (NUDT) dhe qëndron në Qendrën Kombëtare të Superkompjuterëve në Guangzhou.
Tianhe-2 u vendos në krye të 500 superkompjuterëve më të shpejtë të botës për tre vite me radhë nga 2013 deri në 2016-ën, një vit pasi SHBA vendosi NUDT në listën e zezë duke i kufizuar qasjen në procesorët Intel që përdorte për superkompjuterët.
Një tjetër superkompjuter i fuqishëm Kinez është Sunway TaihuLight i cili renditej i shtati për nga performanca në listën e publikuar në Qershor të 2023.
/PCWorld Albanian
BURIMI: PCWORLD.AL
