Këshilltari komunal nga radhët e AKO-së Huzeir Mustafi i ka dërguar një porosi publike liderit të VLEN-it, Izet Mexhiti, duke e sfiduar që deklaratat e tij kundër kryetarit të Kumanovës, Maksim Dimitrievski, t’i dëshmojë edhe me veprime konkrete.
Mustafi e cilëson Mexhitin si një nga politikanët më kontravers në historinë e RMV-së, duke rikujtuar se ai për dy dekada ka qenë pjesë e strukturave drejtuese të BDI-së, ndërsa sot e kritikon këtë parti për korrupsion dhe dështime.
Ai gjithashtu rikujton marrëveshjen e arritur mes Mexhitit dhe Dimitrievskit, për të cilën, sipas tij, qytetarët e Kumanovës nuk janë informuar se cilat kanë qenë pikat konkrete të saj.
Duke komentuar deklaratën e fundit të Mexhitit se, nëse Dimitrievskit i pengon gjuha shqipe, duhet ta lëshojë postin e kryetarit të komunës, Mustafi i ka kërkuar atij që të ndërmarrë një hap konkret.
“Urdhëroni, tre këshilltarët tuaj në Komunën e Kumanovës le ta braktisin shumicën e pushtetit lokal”, është porosia e Mustafit për Mexhitin.
Në fund, ai thekson se kjo do të ishte një mundësi për të dëshmuar nëse qëndrimet e shprehura publikisht janë serioze apo mbeten vetëm deklarata për përfitime të momentit politik.
Burimi: lajmpress.org
