Forcat ukrainase godasin bazën e njësisë ruse të dronëve “Rubicon” në territorin e pushtuar

Ukraina ka goditur një bazë të njësisë elitare ruse të dronëve “Rubicon”, e vendosur thellë në territorin e pushtuar, në qytetin e Berdjanskut, në rajonin e Zaporizhzhias.

Forcat e Mbrojtjes Jugore të Ukrainës njoftuan më 9 nëntor se operacioni ishte realizuar në bashkëpunim me Shërbimin e Inteligjencës së Jashtme, Shërbimin e Sigurisë së Ukrainës dhe Regjimentin e 412-të të Sistemeve të Veçanta Pa Pilot.

Sipas Shtabit të Përgjithshëm ukrainas, sulmi ishte kryer më 7 nëntor, ndërsa objektivat ishin një pikë e përkohshme e vendosjes së njësisë “Rubicon” dhe një qendër për kontrollin e dronëve.

Baza ndodhej rreth 107 kilometra prapa vijës së frontit.

“Humbjet e armikut ende po vlerësohen, por ndikimi tashmë është i dukshëm: çdo pikë kontrolli e çaktivizuar nënkupton më pak dronë rusë mbi pozicionet dhe rrugët tona”, deklaroi Shtabi i Përgjithshëm ukrainas.

Forcat e Mbrojtjes Jugore thanë se në sulm njësia ruse humbi specialistë të trajnuar, të cilët merreshin me përgatitjen e operatorëve të dronëve dhe përcillnin përvojën e tyre te pjesëtarët e tjerë.

Pamjet e publikuara nga operacioni tregojnë dronët ukrainas duke goditur disa pika përreth një kompleksi ndërtesash, që dyshohet se shërbente si bazë e njësisë “Rubicon”.

“Ky operacion dëshmon edhe një herë se për pushtuesit rusë nuk ekziston asnjë zonë e sigurt prapa frontit”, deklaruan forcat ukrainase.

Qendra për Teknologji të Avancuara Pa Pilot “Rubicon” është një njësi e madhe ruse e specializuar në përdorimin e dronëve dhe përbën një nga strukturat kryesore të forcave ruse të sistemeve pa pilot.

Ajo specializohet në ndërprerjen e logjistikës ukrainase, gjurmimin dhe goditjen e ekipeve ukrainase të dronëve në terren, si dhe interceptimin e mjeteve ajrore pa pilot të përdorura për zbulim dhe sulme ndaj objektivave me rëndësi të lartë.