Kanadaja është bërë vendi i parë jo-evropian që i bashkohet fondit të ri të mbrojtjes së Bashkimit Evropian, një program shumë-miliardësh që synon rritjen e kapaciteteve ushtarake të Evropës. Lëvizja vjen ndërsa Ottawa kërkon të diversifikojë bashkëpunimin e saj të mbrojtjes dhe të zvogëlojë varësinë nga Shtetet e Bashkuara.
Kryeministri kanadez Mark Carney njoftoi se Kanadaja i është bashkuar iniciativës SAFE, një fond prej 150 miliardë eurosh, i krijuar nga BE-ja për të përshpejtuar riarmatimin dhe për të forcuar gatishmërinë mbrojtëse deri në vitin 2030.
Sipas Carney-t, pjesëmarrja në SAFE do t’i ofrojë industrisë kanadeze të mbrojtjes “mundësi të jashtëzakonshme” falë qasjes më të gjerë në tregun evropian.
Presidentja e Komisionit Evropian, Ursula von der Leyen, e cilësoi këtë hap si një “niveli të ri bashkëpunimi” mes BE-së dhe Kanadasë.
Programi SAFE u krijua pas shqetësimeve në rritje për rrezikun e një sulmi të mundshëm rus ndaj Evropës dhe hezitimeve për mbështetjen e vazhdueshme të SHBA-së.
Ky është një nga hapat e parë të mëdhenj të Carney-t për të larguar varësinë nga furnizimet dhe kontratat me Shtetet e Bashkuara.
Më herët, kryeministri kanadez kishte deklaruar se më shumë se 70 për qind e shpenzimeve ushtarake të vendit nuk do të shkonin më drejt kompanive amerikane.
Burimi: botasot.info
