Drejtoria e Policisë Financiare ngriti një kallëzim penal në Prokurorinë Themelore Publike në Shkup kundër personit J.M., ish-drejtor i përgjithshëm i SH.A.-së shtetërore “Posta e Maqedonisë së Veriut” dhe kryetar i Bordit të Drejtorëve, për shkak të ekzistencës së bazave të dyshimit për kryerjen e veprës penale “Keqpërdorim i pozitës dhe autoritetit zyrtar” sipas nenit 353 të Kodit Penal të Republikës së Maqedonisë së Veriut.
Siç njoftoi Policia Financiare, në periudhën nga viti 2021 deri në vitin 2022, i kallëzuari duke vepruar në kundërshtim me Statutin e shoqërisë dhe Ligjin për Shoqëritë Tregtare, nuk ndërmori veprime për zbatimin e vendimeve dhe përfundimeve të Bordit të Drejtorëve për pagesën e detyrimeve monetare ndaj dy personave juridikë në shumën totale prej 19.292.984,00 denarë.
“Pavarësisht faktit se i ishin dorëzuar dokumentet e nevojshme të pagesës, i pandehuri nuk e nënshkroi marrëveshjen për pagesën e borxhit, nuk i konfirmoi faturat dhe nuk i nënshkroi urdhëresat e pagesës. Duke vepruar në këtë mënyrë, ai mundësoi që të nisin procedurat ligjore kundër kompanisë, pas të cilave vendimet gjyqësore përcaktuan detyrime për të paguar kamatë ndëshkuese”, deklaron Policia Financiare.
Në këtë mënyrë, SH.A. “Posta e Maqedonisë së Veriut” pësoi dëm total prej 10.968.483,00 denarësh në bazë të kamatës ndëshkuese.
Burimi: botasot.info
