Liverpool dhe Eintracht Frankfurt pritet të zhvillojnë kontakte të drejtpërdrejta sot për të finalizuar strukturën e bonuseve në marrëveshjen për Hugo Ekitike.
Të dy klubet janë në fazat përfundimtare të negociatave dhe synojnë të mbyllin gjithçka brenda orëve në vijim.
Sipas Fabrizio Romano, marrëveshja e përgjithshme mes klubeve është arritur, por mbeten për t’u përcaktuar detajet përfundimtare në lidhje me shtesat e mundshme të bazuara në performancën e lojtarit.
Ekitike ka qenë i qartë në qëllimin e tij: Liverpool është zgjedhja e tij e vetme. Ai tashmë ka rënë dakord për një kontratë gjashtëvjeçare dhe ka përfunduar kushtet personale me klubin anglez, duke treguar vendosmërinë për t’u bashkuar me “The Reds”.
Nëse marrëveshja finalizohet me sukses, ajo mund të bëhet shitja më e madhe në historinë e Eintracht Frankfurtit, duke kaluar edhe 95 milionë eurot e fituara nga transferimi i Randal Kolo Muani.
Sezoni i fundit, Ekitike ka pasur një formë të jashtëzakonshme, me 22 gola dhe 12 asiste. Performanca e tij ka tërhequr interesin e disa klubeve elitare, por Liverpooli ka vepruar me vendosmëri për ta siguruar si objektivin kryesor në sulm.
Liverpool kishte monitoruar edhe sulmuesin e Newcastle, Alexander Isak, por mungesa e gatishmërisë për ta shitur atë e ktheu vëmendjen te 22-vjeçari francez, i cili shihet si një përforcim i madh për repartin ofensiv.
Tani, 24 orët e ardhshme pritet të jenë vendimtare për përfundimin e një prej transferimeve më emocionuese të kësaj vere për Liverpoolin.
Burimi: botasot.info
