Një ish-mbretëreshë bukurie në Meksikë është gjetur e vrarë me armë zjarri në apartamentin e saj në Meksiko City, në një rast që autoritetet po e hetojnë si vrasje të mundshme brenda familjes.
Sipas mediave vendase, përfshirë Reporte Índigo, 27-vjeçarja Carolina Flores Gómez u gjet e pajetë të enjten e kaluar në banesën e saj në zonën Polanco të kryeqytetit. Sipas informacioneve paraprake, ajo dyshohet se është qëlluar me armë zjarri.
Hetuesit besojnë se ngjarja mund të ketë ndodhur një ditë përpara njoftimit të policisë, ndërsa po shqyrtohen rrethanat e vonesës në raportim. Sipas raportimeve mediatike, në apartament ndodheshin edhe bashkëshorti i saj, Alejandro Gómez, si dhe nëna e tij, Erika María, e cila konsiderohet aktualisht si personi kryesor i dyshuar.
Punonjës të kompleksit rezidencial kanë deklaruar se nuk kanë dëgjuar të shtëna apo vërejtur lëvizje të pazakonta në momentin e ngjarjes. Ndërkohë, hetuesit kanë kryer ekzaminimet në vendngjarje dhe po mbledhin prova mjeko-ligjore.
Carolina Flores Gómez kishte fituar titullin “Miss Teen Universe” për shtetin Baja California në vitin 2017.
Rasti ka tërhequr vëmendjen e autoriteteve lokale dhe opinionit publik. Guvernatorja e Baja California, Marina del Pilar Ávila, ka bërë thirrje për një hetim të plotë dhe të shpejtë të ngjarjes.
“Çdo krim kundër grave duhet të hetohet dhe të mos mbetet pa ndëshkim. Mendimet tona janë me familjen në këtë moment tragjik,” është shprehur ajo për mediat.
Organizatat për të drejtat e grave kanë reaguar gjithashtu, duke kërkuar që rasti të trajtohet me seriozitet në kontekstin e dhunës ndaj grave në vend. Sipas të dhënave zyrtare, në Meksikë vriten mesatarisht rreth 10 gra në ditë, ndërsa një pjesë e vogël e rasteve përfundojnë me dënime.
Burimi: botasot.info
