Intervistë me Biljana Ivanovska, Ish kryetare e Antikorrupsionit

17

Shkup, 10 gusht – Në kohën kur Antikoprrupsioni funksionin pa kryetar, ish drejtuesja e këtij institucioni Biljana Ivanovska thotë se institucioni e ka humbur besimin, megjithëse përbërja e mëparshme la bazë të mirë që të vazhdojë të ndërtohet. Sipas saj, problemi kryesor është transparenca e vogël. Ivanovska në një intervistë për Alsat thotë se është e rëndësishme të zgjidhen anëtarë të pavarur të Komisionit dhe kryetar i pavarur dhe kjo do të bëhet në mënyrë që do të dëgjohet edhe zëri i sektorit civil e jo vetëm i partive politike.

1. Komisioni Shtetëror për Parandalimin e Korrupsionit është organ që duhet të gëzojë besim të madh te qytetarët. Kemi pasur besim të tillë në përbërjen e mëparshme të anëtarëve të Antikorrupsionit, por nuk është kështu tani, përveç situatës me kryetaren që dha dorëheqje, ky organ nuk gëzon besimin e qytetarëve. Ku qëndron problemi, çfarë ka ndodhur, çfarë solli që të ketë rënie të besimit te anëtarët e Antikorrupsionit?

“Për të pasur besim, duhet të punoni me integritet, sipas ligjit, në mënyrë të paanshme, profesionale, me përgjegjësi, me llogaridhënie, me transparencë, mbi të gjitha me transparencë. E dini se si ishim transparentë me mediat, me plotë kuptimin e fjalës, për të gjitha çështjet që e shqetësonin publikun dhe duhet ta lini anash interesin personal. I gjithë funksionimi duhet të vihet në shërbim të interesit publik. Funksioni nuk e bën njeriun, njeriu e bën funksionin dhe i jep mundësi për t’u gjallëruar. Gjetëm Komision jofunksional, institucioni ishte pa komision disa muaj, por i bëmë të gjitha përpjekjet, njohuritë, aftësitë, profesionalizmin, shprehimisht gjithçka, motivim të fortë për të pasur sukses dhe deri diku ia dolëm, megjithëse kishte ende disa gjëra që duheshin të zgjidhen, kaq e kufizuar është koha dhe mandati, por mendoj se pasardhësit tanë kishin bazë të mirë për të ecur përpara, për të mos e ulur besimin.

2. Çfarë ndodhi. Nëse përbërja e mëparshme e anëtarëve të Antikorrupsionit ka lënë bazë të mirë që besimi të vazhdojë të ndërtohej, pse tani kemi kundër-efekt, çfarë çoi në prishjen e besimit?

“Ju thashë se çfarë nevojitet për të ndërtuar besimin, pasi ai prishet, do të thotë që të gjithë komponentë janë humbur diku në hapësirën e kohës dhe ndodhi ajo që ndodhi”.

3. E përmendët transparencën, seancat mbaheshin online si atëherë ashtu edhe tani, por kur ishit kryetare e Antikorrupsionit ishit në dispozicion të mediave, ju dhe anëtarët e Komisionit, tani nuk është kështu. Rënia e transparencës a çon në rënie të besimit tek qytetarët dhe pse tani kemi rënie të transparencës, çfarë po ndodh sipas mendimit tuaj?

“Transparenca është shumë e rëndësishme. Përgjegjësia, llogaridhënia dhe transparenca janë parimet më të rëndësishme që duhet të rrezatojnë nga një institucion i pavarur. Çfarë ndodhi? Pra, supozoj se prioritetet ishin të ndryshme, stili i punës, i menaxhimit ishte i ndryshëm dhe çoi në mospërputhje të tillë. Nuk mund të flas për të tjerët tani, ne shohim vetëm rezultatet dhe nuk e dimë se çfarë fshihet pas tyre, domethënë çfarë kanë menduar kur kanë punuar për të arritur rezultate të tilla.

4. Si të zgjidhen anëtarë të pavarur të Komisionit Antikorrupsion dhe a mund të rilindë kjo përbërje aktuale me udhëheqës të ri, i cili do të ketë mision të vështirë, do të thosha, të rikthejë besimin e këtij organi?

“Secili që vjen për të qenë kandidat ka prapavijën e tij profesionale, jetësore, e kështu me radhë. Thënë thjesht, nga marrëdhëniet me fqinjët te marrëdhëniet me kolegët në punë, sjellja profesionale e kështu me radhë. Pra, secili ka përmbajtjen e vet që e sjell me vete. Kjo përmbajtje del lehtë në sipërfaqe dhe duhet të dëgjohet në mënyrë që të mos injorohet nga ata që e vendosin dhe që i shkruajnë pikët për kandidatët. Ju kujtohet që kishim situatë kur përfaqësuesja e sektorit civil i dha shumë pak pikë ish kryetares që dha dorëheqje dhe askush nuk reagoi për këtë. Pse nuk reagoi? Pra, nëse dikush nga Komisioni ka dyshime, atëherë të gjitha gjërat duhet të shqyrtohen se pse ekziston ky dyshim, pavarësisht nëse është i bazuar apo jo, në mënyrë që të gjithë të kenë mendim pozitiv se po zgjedhin kandidatin më të mirë, domethënë se po zgjedhin kandidat që do të japë më të mirën e tij, pra, kjo është shumë e rëndësishme. E dini si thonë anglezët “gjithçka varet nga njeriu në krye” (all depends from the man at the top), unë besoj se mundet. Mendoj se atje ka kapacitet, ka shumë energji, por ajo që ka rëndësi është se si do të drejtohet, nëse ka dikush që do ta drejtojë në drejtimin e duhur, pse jo. Më vjen keq që tani disa këshilltarë të mirë po largohen nga institucioni, por kur tregohet vendosmëri e caktuar dhe drejtim i saktë, mendoj se njerëzit e tjerë do të motivohen të gjejnë punë dhe të kontribuojnë në atë institucion sepse ai me të vërtetë ka rol shumë të rëndësishëm, rol parandalues, mbi të gjitha. Pra, nuk është institucion që duhet të merret kryesisht me ndjekje penale, si prokuroria, por me parandalimin, zbulimin e dobësive në sistem, dhënien e rekomandimeve, rregullimin e tyre që sistemet tona të funksionojnë më mirë, pra, a ka diçka më të mirë se kjo? Në vend që të merremi me problemet që kanë ndodhur tashmë, veprat që kanë ndodhur tashmë, aktet penale e kështu me radhë, ne duhet të parandalojmë në mënyrë që të kemi sistem funksional./Alsat.mk