Kryetari i Alternativës dhe njëherësh një nga liderët e koalicionit VLEN, Zeqirija Ibrahimi, ka marrë pjesë sonte në akademinë solemne të organizuar me rastin e Ditës së Alfabetit dhe përvjetorit të Institutit të Trashëgimisë Shpirtërore e Kulturore të Shqiptarëve në Shkup. Ngjarja u organizua nga Qeveria e Maqedonisë së Veriut në bashkëpunim me Institutin.
Në kuadër të programit u hap edhe ekspozita “Shtypshkronja dhe Kongresi”, e cila i kushtohet shtypshkronjës “Bashkimi i Kombit” – “Shtypshkronja Tregtare Ndërkombëtare”, si dhe delegatëve të Kongresit të Manastirit.
Ibrahimi theksoi rëndësinë e veçantë që ka Dita e Alfabetit për shqiptarët në të gjitha trojet, veçanërisht për shqiptarët e Maqedonisë së Veriut, duke kujtuar se Kongresi i Manastirit përbën një prej momenteve themelore të historisë kombëtare.
“Dita e Alfabetit Shqip është njëra prej ngjarjeve më të rëndësishme kulturore dhe historike të shqiptarëve në të gjitha trojet, e sidomos të shqiptarëve të Maqedonisë së Veriut, pasi kjo ngjarje u zhvillua në Manastir,” shkroi Ibrahimi.
Ai kujtoi se më 22 nëntor 1908 u vendosën themelet e orientimit të kombit shqiptar në Ballkan dhe në botë.
“Vizioni i rilindasve tanë ishte i qartë – shqiptarët duan të ecin në hap me kombet dhe popujt e tjerë duke fituar lirinë, fillimisht kulturore, më pas edhe atë politike,” tha ai, duke uruar shqiptarët për këtë ditë të shënuar.
“Urime për shumë mote 22 Nëntori i Alfabetit!”, përfundoi Ibrahimi.
Burimi: alfax.mk
