Ibrahimi: Edhe Ambasada e Shqipërisë në Shkup e mori vesh se shqipja nuk është zyrtare

Në lidhje me zhurmën e shkaktuar nga opozita shqiptare për provimin e jurisprudencës, ka reaguar Zeqirija Ibrahimi.

Në reagimin e tij, Ibrahimi shkruan se “ra provimi i jurisprudencës e u pamë”, duke shtuar se pas disa viteve nga pretendimet se gjuha shqipe ishte bërë zyrtare, realiteti po dëshmon të kundërtën.

“Pas disa viteve, qëkur e kishin gënjyer kryeministrin e Shqipërisë se shqipja në RMV është bërë zyrtare, më në fund edhe Ambasada e Republikës së Shqipërisë në Shkup e mori vesh se shqipja te ne nuk qenka zyrtare dhe se një provim i jurisprudencës në shtetin tonë nuk mbaheshka edhe shqip për së paku dy dekada me radhë,” shkroi ai.

Sipas Ibrahimit, ky zhvillim tregon se çështja e përdorimit real të gjuhës shqipe në sistemin institucional mbetet problematike, pavarësisht deklarimeve politike të mëhershme.

“Askush nuk është vonë për ta kuptuar të vërtetën,” përfundon ai në reagimin e tij.

Çështja e statusit dhe përdorimit praktik të gjuhës shqipe në institucionet e Maqedonisë së Veriut ka qenë shpesh objekt debatesh politike dhe publike, veçanërisht në raport me zbatimin e ligjit për përdorimin e gjuhëve.