Temperaturat e larta nxisin vdekjet e papritura. Por si ndodhin ato te individë të ndryshëm?
“Janë persona 50-60 vjeç, të cilët nuk bëjnë kontrolle se thonë: ‘Nuk jam i sëmurë’“, shprehet Skënder Brataj.
Kreu i Urgjencës Kombëtare, Skënder Brataj, thekson se në këto ditë të nxehta numri i thirrjeve për ndihmë mjekësore është rritur me 200 në ditë, ndërkohë që shpjegon si ndikon vapa në infarkte, tromboemboli të mushkërive apo ishemi të trurit, të cilat janë vdekjeprurëse.
“Arterioskleroza në enët e gjakut nis ngadalë dhe në vazhdimësi. Ne humbim lëngje dhe gjaku, në mungesë të tyre, trashet duke krijuar trombe. Po varet ku i bën ato trombe, në enët koronare që çojnë në infarkt, në mushkëri apo në enët që çojnë gjak në tru, duke shkaktuar ishemi.”, shton Brataj.
Por, përveç lëngjeve, Brataj thekson shumë të rëndësishëm elektrolitet që humbim nga vapa dhe rëndësinë e konsumit deri në 2 litra ujë.
“Natriumi dhe kaliumi duhet të jenë në balancë, humbja e elektroliteve i çekuilibron ato…”, thekon ai.
Brataj këshillon kujdes të shtuar për të moshuarit dhe foshnjat që të hidratohen, ndërsa ata të cilët punojnë jashtë të shmangin orët e pikut. Nuk rekomandohet përdorimi i biçikletës deri në orët e pasdites, pasi sforcon organizmin.
Burimi: botasot.info
