Ministri për Evropën dhe Punët e Jashtme i Shqipërisë, Ferit Hoxha, është takuar në Bruksel me Komisioneren Evropiane për Zgjerimin, Marta Kos, me të cilën ka diskutuar hapat e ardhshëm të Shqipërisë drejt anëtarësimit në Bashkimin Evropian.
Pas publikimit të Raportit të Progresit 2026, në fokus të takimit kanë qenë vazhdimi i negociatave, mbyllja e kapitujve, zbatimi i Planit të Rritjes dhe përmbushja e reformave të kërkuara në rrugën drejt integrimit evropian.
Përmes një postimi në Facebook, Hoxha ka theksuar se Shqipëria ka krijuar një momentum të rëndësishëm në procesin e integrimit, duke nënvizuar nevojën që ky progres të konkretizohet me rezultate.
“Shqipëria ka krijuar një momentum të fortë dhe real. Tani është koha ta përkthejmë në rezultate të matshme”, ka deklaruar Hoxha.
Ai ka bërë të ditur se, me mbështetjen e Komisionit Evropian dhe vendeve anëtare, Shqipëria synon të ruajë ritmin e reformave dhe negociatave, me objektiv anëtarësimin e plotë në Bashkimin Evropian.
Burimi: botasot.info


