Sekretari i Mbrojtjes i SHBA-së Pete Hegseth njoftoi sot se ushtria amerikane kreu një sulm vdekjeprurës ndaj një anijeje në Oqeanin Paqësor lindor mbrëmë, duke vrarë dy persona në bord.
Ky është sulmi i tetë i njohur nga ushtria amerikane ndaj anijeve të dyshuara për përfshirje në trafik droge që nga fillimi i shtatorit. Por ndryshe nga shtatë sulmet e mëparshme në Detin e Karaibeve, ky shënon zgjerimin e fushatës në Paqësor, ku sulme të tilla nuk janë regjistruar më parë.
“Narko-terroristët që synojnë të sjellin helm në brigjet tona nuk do të gjejnë strehë të sigurt askund në kontinentin tonë”, shkroi Hegseth në X, ku ai postoi edhe pamjet nga sulmi.
Sipas tij, anija që u godit ishte në pronësi të një organizate terroriste dhe u përdor për kontrabandë droge në Paqësorin Lindor.
Hegseth tha se sipas inteligjencës, anija ishte e përfshirë në transportin e paligjshëm të drogës, se po udhëtonte përgjatë një rruge të njohur kontrabande dhe se po transportonte drogë.
Ai theksoi se nuk kishte të lënduar midis forcave amerikane dhe ai i krahasoi kontrabandistët me rrjetin terrorist Al-Kaeda.
“Ashtu si Al-Kaeda bëri luftë kundër atdheut tonë, këto kartele bëjnë luftë kundër kufirit tonë dhe popullit tonë. Nuk do të ketë strehim apo falje – vetëm drejtësi”, shkroi Hegseth, transmeton KosovaPress.
Javën e kaluar, SHBA kreu dy sulme ndaj anijeve në Detin e Karaibeve, ku jo të gjithë anëtarët e ekuipazhit u vranë. Në një rast, Marina Amerikane kapi dy të mbijetuar, të cilët i deportoi në vendet e tyre të origjinës – Ekuador dhe Kolumbi.
Përshkallëzimi i fushatës ushtarake amerikane kundër karteleve të drogës shënon një ndryshim në mënyrën se si Uashingtoni e trajton krimin e organizuar, jo më si një çështje penale, por si një çështje lufte.
Kritikët paralajmërojnë për precedentë të rrezikshëm dhe mungesë të kuadrit ligjor, ndërsa zyrtarët e administratës thonë se ato janë masa të nevojshme për të mbrojtur qytetarët amerikanë, raportojnë mediat amerikane.
Burimi: botasot.info
