Harry rrëfen pendesën më të madhe për bisedën e fundit me Princeshën Diana

Princi Harry ka rrëfyer se një nga pendesat më të mëdha të jetës lidhet me bisedën e fundit telefonike që pati me nënën e tij, princeshën Diana, pak orë para vdekjes së saj tragjike në vitin 1997.

Në një intervistë për revistën “GQ”, Harry kujtoi se në atë kohë ishte vetëm 12 vjeç dhe dëshironte të kthehej për të luajtur me kushërinjtë, pa e ditur se ajo do të ishte biseda e fundit me të ëmën.

“Po ta dija se ishte biseda e fundit me të, sa ndryshe do të kishte qenë. Dhe unë jam ai që duhet të jetojë me këtë”, u shpreh ai.

Diana i kishte telefonuar Harryt dhe vëllait të tij, princit William, nga Parisi, disa orë para se të humbiste jetën në një aksident automobilistik më 31 gusht 1997, në moshën 36-vjeçare.

Në atë kohë, dy djemtë ndodheshin me babanë e tyre në kështjellën Balmoral, në Skoci.

Harry ka treguar edhe më parë se nuk i kujtohet saktësisht çfarë i kishte thënë nënës gjatë asaj bisede, por se do të pendohet gjatë gjithë jetës për faktin që ajo ishte kaq e shkurtër.

Në intervistën e fundit, zbuloi gjithashtu se pas vdekjes së Dianës kishte ndjekur terapi për vite me radhë.

Edhe sot, njerëzit i afrohen për t’i treguar se ku ndodheshin kur morën lajmin për vdekjen e princeshës, një humbje që vazhdon të lërë gjurmë të thella në jetën e tij.