​Gruaja britanike humb jetën teksa përpiqej të shpëtonte djemtë e saj në Bahama

Bashkëshorti i një gruaje britanike, e cila humbi jetën teksa përpiqej të shpëtonte djemtë e saj pasi ata u morën nga rryma e detit në Bahama, është shprehur se gruaja e tij ishte “një heroinë si në jetë, ashtu edhe në vdekje”.

Leanne Gregory, nga Stapleford në Nottinghamshire, po praktikonte zhytje me maskë së bashku me familjen e saj të martën, kur një rrymë e fortë i mori djemtë, njoftoi policia. Edhe pse fëmijët u shpëtuan nga ujërat pranë ishullit Bimini, nëna e tyre nuk mundi të shpëtohej, deklaroi policia e Bahamas.

Nathan Gregory tha se humbja e bashkëshortes së tij 36-vjeçare është “e paimagjinueshme” për familjen e tyre.

“Ajo ishte bashkëshortja, nëna dhe shoqja më e sinqertë dhe më e mrekullueshme që ka shkelur ndonjëherë në këtë Tokë,” shkroi ai në një postim në Facebook.

Gregory njoftoi se ka krijuar gjithashtu një faqe për mbledhjen e fondeve “për djemtë e tij dhe sigurinë e tyre pas kësaj humbjeje tragjike”.

“E vetmja gjë që mund të bëj është të jem mirënjohës që ajo ishte një heroinë e vërtetë, si në jetë ashtu edhe në vdekje, dhe të ndihem thellësisht falënderues që djemtë e mi u shpëtuan shëndoshë e mirë,” shtoi Gregory.

Policia njoftoi në rrjetet sociale se, pak pas orës 10:00 të mëngjesit (me orën lokale) të së martës, efektivët morën një njoftim se një grua, e cila nuk shfaqte shenja jete, ishte gjetur në një port tragetesh në North Bimini.

Më pas, Leanne Gregory u transportua në një klinikë lokale, ku u konstatua vdekja e saj. Policia konfirmoi se do të kryhet një autopsi, por theksoi se “nuk ka dyshime për ndonjë vepër penale”.