Ministri i Turizmit, Kulturës dhe Sportit i Shqipërisë, Blendi Gonxhja, ka theksuar rëndësinë e mbrojtjes dhe avancimit të të drejtave gjuhësore të shqiptarëve në North Macedonia, duke i cilësuar ato si standard demokratik të panegociueshëm.
Gjatë një takimi me aktivistin dhe studentin tetovar Mevlan Ademi, njërin nga udhëheqësit e protestave paqësore për të drejtat gjuhësore, si dhe në prani të ambasadorit të Shqipërisë në Shkup, Denion Meidani, ministri Gonxhja diskutoi mbi nevojën për respektim të plotë të përdorimit të gjuhës amtare në të gjitha nivelet institucionale dhe publike.
Statusi i plotë i ministrit Gonxhja:
Me aktivistin Mevlan Ademi, studentin tetovar që udhëhoqi me guxim manifestimet paqësore në Maqedoninë e Veriut, si dhe në prani të Ambasadorit të Shqipërisë në RMV, Denion Meidani, diskutuam mbi rëndësinë e mbrojtjes dhe avancimit të të drejtave gjuhësore si një standard i panegociueshëm demokratik.
Respektimi dhe garantimi efektiv i përdorimit të gjuhës amtare, në çdo nivel institucional dhe publik, për mbi 600 mijë qytetarët autoktonë shtetformues me kombësi shqiptare, nuk është privilegj, por një detyrim universal që buron nga parimet e barazisë dhe shtetit të së drejtës, të garantuara nga Marrëveshja e Ohrit.
Gjuha shqipe mbetet një shtyllë identitare dhe një faktor kyç për barazi reale, përfaqësim dinjitoz dhe bashkëjetesë të qendrueshme në shoqëri, duke kontribuar në forcimin e miqësisë dhe bashkëpunimit mes vendeve tona.
Burimi: lajmpress.org
