Gazeta e njohur sllovene Delo i ka kushtuar një artikull të veçantë ndeshjes mes Sllovenisë dhe Kosovës, duke theksuar se kjo përballje mund të shënojë një moment historik për përfaqësuesen dardane në rrugën drejt Kupës së Botës 2026.
Sipas Delo-s, Kosova “ka kapur futbollin e historisë” dhe ndodhet para një mundësie të artë për të siguruar pjesëmarrjen në fazën “play-off” të kualifikimeve botërore. Gazeta vlerëson se nën drejtimin e trajnerit gjerman Franco Foda, skuadra kosovare ka treguar përmirësim të dukshëm në lojë dhe në organizim, ndërsa rezultati në Lubjanë mund të jetë vendimtar për të ardhmen e saj në këtë cikël.
Në artikull përmendet gjithashtu atmosfera që pritet në stadiumin “Stožice”, ku parashikohet një numër i madh tifozësh nga Kosova, duke krijuar një ambient të veçantë për ndeshjen.
“Për Kosovën, kjo nuk është vetëm një ndeshje kualifikuese, por një hap drejt ëndrrës për të marrë pjesë për herë të parë në Kupën e Botës”, shkruan Delo, duke shtuar se Sllovenia duhet të tregojë kujdes ndaj një kundërshtari që po fiton gjithnjë e më shumë përvojë dhe vetëbesim në arenën ndërkombëtare.
Në fund, media sllovene thekson se rezultati i këtij dueli mund të ndikojë drejtpërdrejt në renditjen përfundimtare të grupit dhe në fatin e dy kombëtareve në garën për Botërorin 2026.
Burimi: botasot.info
