Kryetari i Kuvendit të Maqedonisë së Veriut, Afrim Gashi, gjatë vizitës së tij zyrtare në Uashington, ka zhvilluar një takim me anëtaren e Kongresit të Shteteve të Bashkuara, Claudia Tenney, bashkëkryetare e Grupit Parlamentar për Maqedoninë e Veriut në Kongresin Amerikan.
Në këtë takim, Gashi ka riafirmuar orientimin strategjik dhe partneritetin e qëndrueshëm mes dy vendeve, duke vlerësuar lart mbështetjen e vazhdueshme amerikane për zhvillimin demokratik dhe stabilitetin rajonal.
“Konfirmova orientimin strategjik dhe partneritetin e qëndrueshëm ndërmjet Maqedonisë së Veriut dhe Shteteve të Bashkuara, ndërsa shpreha mirënjohje për angazhimin e saj personal dhe të Kongresit Amerikan në zhvillimin demokratik, sigurinë dhe stabilitetin e rajonit”, ka deklaruar Gashi.
Sipas tij, në fokus të bisedimeve ka qenë edhe roli i Maqedonisë së Veriut si aleate e besueshme në kuadër të NATO-s, si dhe rëndësia e lidershipit amerikan në sigurinë euroatlantike.
“Diskutuam për rolin aktiv të RMV si aleate e besueshme në NATO, rëndësinë e lidershipit amerikan në sigurinë euroatlantike, si dhe nevojën për forcimin e bashkëpunimit ndërparlamentar”, theksoi kryeparlamentari.
Gashi ka nënvizuar gjithashtu përkushtimin e institucioneve të vendit ndaj vlerave demokratike, reformave institucionale dhe sfidave që shoqërojnë procesin e integrimit evropian.
Në fund të takimit, palët riafirmuan gatishmërinë e përbashkët për thellimin e mëtejshëm të miqësisë dhe partneritetit mes Maqedonisë së Veriut dhe Shteteve të Bashkuara të Amerikës.
Burimi: alfax.mk
