Pas një jave ndërprerje, Samsung vijoi përsëri zgjerimin e përditësimeve të Android 14 duke përfshirë Galaxy Tab S9 FE dhe Galaxy S21 FE.
Kompania ka lançuar tashmë Android 14 dhe One UI 6 për dhjetëra pajisje ndërsa dita ditës kjo listë pasurohet më tutje.
Këtë javë janë në vëmendje pajisjet buxhetor ku përfshihet Galaxy Tab S9 FE lançuar së fundi. Përditësimi i tabletit ka filluar në Europë ndërsa në javët në vijim do të përfshijë edhe vende të tjera të botës.
Gjithashtu Galaxy S21 FE po merr One UI 6. Përditësimi u shfaq në SHBA për operatorin e Verizon ndërsa gradualisht në ditët në vijim do të mbërrijë edhe tek modelet pa operator.
Nga ana tjetër disa seri Galaxy A po përditësohen, konkretisht Galaxy A52s dhe Galaxy A33. Raportohet se edhe Galaxy A14 LTE po përditësohet në One UI 6. /PCWorld Albanian
BURIMI: PCWORLD.AL
