Luis Enrique mund të përballet me sanksione nga FIFA pas një incidenti të rëndë në fund të finales së Kupës së Botës për Klube, ku Chelsea mundi PSG-në me rezultatin 3-0. Goli i João Pedros, së bashku me dopietën e Cole Palmer, i dhanë fitoren londinezëve, por fundi i ndeshjes u shënua nga kaos dhe përplasje.
Tensionet nisën kur João Neves u përjashtua për tërheqje flokësh ndaj Cucurellës, çka ndezi konfliktin mes dy ekipeve. Në një skenë të pazakontë, Luis Enrique u përfshi drejtpërdrejt në përleshje dhe goditi me grusht João Pedron. Trajneri spanjoll u ndalua nga lojtari i tij, Kimpembe, për të shmangur përshkallëzimin. Enrique pretendoi më pas se veprimi i tij ishte reagim ndaj një goditjeje të mëparshme nga Pedro.
Në konferencën për shtyp, Enrique kërkoi falje për incidentin dhe për imazhin që la pas. Sipas analistit dhe ish-gjyqtarit Iturralde González, ndonëse kartonat skadojnë me përfundimin e turneut, FIFA ka të drejtë të ndërmarrë masa shtesë disiplinore në përputhje me nenin 74 të Kodit Disiplinor.
Kujtojmë se FIFA ka vendosur më parë sanksione të rënda për sjellje të dhunshme. Rasti më i njohur është ai i Luis Suárez, i cili u pezullua për nëntë ndeshje dhe u përjashtua nga futbolli për katër muaj pasi kafshoi Chiellinin në Botërorin 2014. Edhe José María Giménez u pezullua për katër ndeshje dhe u gjobit me 20,000 franga.
Tani pritet vendimi i FIFA-s për rastin e Luis Enriques, i cili mund të përballet me ndalim të drejtimit të PSG-së në ndeshje zyrtare ndërkombëtare.
Burimi: botasot.info
