Kapiteni i Manchester United, Bruno Fernandes, ka zbuluar pas fitores 2-1 ndaj Liverpoolit në “Anfield” se mënyra se si skuadra e tij u paraqit në fushë ndikoi drejtpërdrejt në tensionin mes lojtarëve vendas dhe tifozëve të tyre.
Disfata ishte e katërta radhazi për Liverpoolin, ndërsa për Manchester United ishte një fitore e madh në një nga stadiumet më të vështira në Angli.
Duke folur pas ndeshjes, Fernandes theksoi se strategjia e United kishte për qëllim ta prishte ritmin e zakonshëm të Liverpoolit.
“Gjatë pjesës së parë e dinim që ata ishin nën presion sa herë kishin topin. Tifozët e tyre po i vendosnin në vështirësi, sepse i fishkëllenin pak që të luanin më shpejt — dhe kjo është mënyra si Liverpooli pëlqen të luajë,” tha portugezi.
Sipas tij, United e shfrytëzoi këtë situatë për të kontrolluar ndeshjen dhe për të gjetur hapësira vendimtare.
“Ne donim ta ngadalësonim lojën e tyre, sepse kjo do të na krijonte hapësira të mëdha në qendër. Dhe i shfrytëzuam ato. Me topin, luajtëm shumë mirë në pjesën e parë, ndërsa në të dytën mund të kishim bërë edhe më mirë”, theksoi portugezi.
Fitorja në “Anfield” forcon pozitën e Manchester United dhe sjell një frymë të re besimi në skuadër, ndërsa tensioni në kampin e Liverpoolit vetëm sa është thelluar pas serisë së humbjeve.
Burimi: botasot.info
