Një kundërpropozim europian vjen përballë atij amerikan, me me synim përfundimin e luftës në Ukrainë. Ky plan vjen pas reagimeve të forta ndaj planit fillestar SHBA-Rusi, me 28 pika, i cili u cilësua si tepër i ashpër ndaj Kievit, përfshirë kërkesën për lëshim territori dhe reduktim të madh të forcave ukrainase.
Sipas Reuters, kundërpropozimi europian ndryshon disa nga pikat kyçe të planit origjinal dhe përfshin:
-Ushtria ukrainase do të ketë një kufi maksimal prej 800,000 ushtarësh në kohë paqeje, krahasuar me limitin amerikan prej 600,000.
-Anëtarësimi i Ukrainës në NATO do të varet nga pëlqimi i të gjithë shteteve anëtare, i cili “aktualisht nuk ekziston”.
-NATO nuk do të vendosë forca të përhershme në territorin ukrainas në kohë paqeje.
-Ukraina do të kompensohet financiarisht, kryesisht nga asetet ruse të ngrira, derisa Moska të paguajë dëmshpërblime për dëmet e luftës.
-Kievi do të angazhohet të mos rimarrë territoret e pushtuara me mjete ushtarake.
-Negociatat për shkëmbime territoriale do të zhvillohen përgjatë asaj që quhet “vija kontakti”.
-Zgjedhjet në Ukrainë do të mbahen sa më shpejt pas nënshkrimit të marrëveshjes së paqes.
-Shtetet e Bashkuara do t’i ofrojnë Ukrainës garanci sigurie të ngjashme me ato të Neni 5 të NATO-s, që parashikon mbrojtje të përbashkët në rast sulmi.
Burimi: opinion.al
