Bashkimi Evropian ndan mjete për forcimin e kapaciteteve ushtarake dhe sigurisë së vendit, ndërsa përmes instrumenteve të ndryshme financiare mbështet edhe lidhshmërinë rrugore, hekurudhore, energjetike dhe digjitale, theksoi euroambasadori Mihalis Rokas. Ai nënvizoi se BE-ja është fuqishëm e përkushtuar që Maqedonia e Veriut të bëhet anëtare e Unionit sa më shpejt të jetë e mundur, duke vlerësuar se lidhshmëria rajonale dhe forcimi i qëndrueshmërisë janë veçanërisht të rëndësishme në realitetin aktual gjeopolitik, transmeton Portalb.mk.
Duke folur në panel-diskutimin “Lidhshmëria strategjike për stabilitet: BE-ja dhe Maqedonia e Veriut në realitetin e ri gjeopolitik”, Rokas theksoi se përmes Instrumentit Evropian të Paqes për vendin janë ndarë pothuajse 65 milionë euro, ndërsa së shpejti pritet të sigurohen edhe 40 milionë euro shtesë për forcimin e kapaciteteve ushtarake të vendit.
“Prandaj dëshirojmë të ofrojmë përgjigje edhe në fushën e sigurisë. Pikërisht për këtë arsye, përmes Instrumentit Evropian të Paqes kemi ndarë pothuajse 65 milionë euro për Maqedoninë e Veriut. Shpresojmë që së shpejti të arrijmë të sigurojmë edhe 40 milionë euro shtesë për forcimin e kapaciteteve ushtarake të vendit dhe, si anëtare e NATO-s, për avancimin e sigurisë sonë”, tha Rokas.
Ai theksoi se përgjigjja e Bashkimit Evropian dhe e Qeverisë ndaj sfidave aktuale është gjithëpërfshirëse, pasi lidhshmëria, stabiliteti ekonomik dhe siguria janë të ndërvarura.
“Siç e shihni, përgjigjja jonë, përkatësisht përgjigjja e vendeve anëtare të Bashkimit Evropian dhe e Qeverisë këtu, është gjithëpërfshirëse. Përpiqemi t’i shohim të gjitha këto çështje nga e njëjta perspektivë”, theksoi euroambasadori.
Sa i përket lidhshmërisë infrastrukturore, Rokas rikujtoi se BE-ja e mbështet atë që nga viti 2007, përmes disa instrumenteve financiare. Siç tha ai, përmes Instrumentit të Asistencës së Paraanëtarësimit janë ndarë 1,2 miliardë euro, 1,8 miliardë euro shtesë përmes Kornizës së Investimeve për Ballkanin Perëndimor, si dhe 750 milionë euro përmes Planit të Rritjes së BE-së, i cili në Maqedoninë e Veriut zbatohet përmes Agjendës së Reformave.
Ai sqaroi se mbështetja nuk përfshin vetëm infrastrukturën rrugore dhe hekurudhore, por edhe lidhjen energjetike dhe digjitale, si dhe aktivitete të tjera, përfshirë asistencën teknike të nevojshme për realizimin e projekteve.
Si një nga arsyet për investimet në lidhshmëri, Rokas përmendi përkushtimin e BE-së ndaj integrimit evropian të vendit, por edhe faktin se ndërprerjet në zinxhirët e vlerës kanë pasoja për rajonin më të gjerë dhe për Unionin.
“Jemi fuqishëm të përkushtuar që Maqedonia e Veriut të bëhet anëtare e Bashkimit Evropian sa më shpejt të jetë e mundur. Por, kjo ndikon edhe tek ne dhe është shumë e rëndësishme për ne. Nuk bëhet fjalë vetëm për faktin se dy korridore jetike, Korridori 10 dhe Korridori 8, kryqëzohen në një distancë shumë të vogël nga Shkupi. Arsyeja është edhe se jemi të vetëdijshëm që sot kemi zinxhirë të vlerës dhe se edhe nëse ndërpritet vetëm një pjesë e vogël e tyre, kjo ndikon te të gjithë ne”, theksoi euroambasadori.
Duke folur për kontekstin më të gjerë gjeopolitik, Rokas vlerësoi se bota sot përballet me pasiguri të mëdha, si dhe me luftëra dhe konflikte që pengojnë tregtinë dhe rrugët e transportit, rrisin çmimet dhe krijojnë presion shtesë mbi familjet.
Ai përmendi agresionin rus kundër Ukrainës, konfliktet në Lindjen e Mesme dhe luftërat në kontinentin afrikan, përfshirë ato në Sudan dhe Mali, duke theksuar se ato ndikojnë edhe në flukset e migracionit. Sipas tij, sistemi shumëpalësh, i krijuar pas Luftës së Dytë Botërore për të gjetur zgjidhje për konfliktet, sot është dobësuar seriozisht.
“Vendet në mbarë botën, përfshirë edhe ato evropiane, po përballen me vështirësi për shkak të çmimeve, ndërsa familjet janë nën presion. Nuk është e lehtë që elitat politike ose udhëheqësit e BE-së të dalin dhe të thonë: ‘Na vjen keq, kjo ndodh për shkak të luftërave, duhet të gjeni zgjidhje’. Në një situatë të tillë jemi sot”, theksoi Rokas.
Sipas tij, pikërisht për shkak të këtyre sfidave, bashkëpunimi dhe lidhshmëria janë të domosdoshme për ndërtimin e qëndrueshmërisë dhe sigurimin e stabilitetit.
Panel-diskutimi “Lidhshmëria strategjike për stabilitet: BE-ja dhe Maqedonia e Veriut në realitetin e ri gjeopolitik” organizohet nga Instituti për Demokraci “Societas Civilis” – Shkup dhe Fondacioni “Konrad Adenauer”.
Burimi: alfax.mk
