Eshtrat u gjetën në pyll që në vitin 1977, identifikohet viktima pas 49 vitesh

Në Shtetet e Bashkuara të Amerikës është zgjidhur një mister 49-vjeçar. Eshtrat e zbuluara në vitin 1977 në Karolinën e Veriut janë identifikuar si ato të një vajze 15-vjeçare që ishte arratisur nga shtëpia.

Mediat amerikane shkruajnë se, në 29 dhjetor 1977, mbetje skeletore dhe rroba u zbuluan në një zonë të pyllëzuar pranë një fabrike prodhimi gomash në Wilson, një qytet afërsisht 40 milje në lindje të Raleigh.
Pas dekadash testesh të ADN-së, duke përfshirë përparimet në teknologji, hetuesit identifikuan mbetjet si të Cindy Marcell Blizzard, një vajze 15-vjeçare që ishte arratisur nga shtëpia e saj në Monkton, Maryland, në pranverën e vitit 1977.

Kur mbetjet u zbuluan në vitin 1977, një raport mjeko-ligjor përcaktoi se ato i përkisnin një femre midis moshës 16 dhe 23 vjeç, e cila ndoshta kishte qenë në zonë për gjashtë muaj deri në dy vjet.

Edhe pse zyra e mjekut ligjor e klasifikoi mënyrën e vdekjes si të papërcaktuar, rrethanat rreth vendndodhjes dhe gjetjes së mbetjeve mortore ngritën mundësinë e një akti të paligjshëm, duke shtuar se hetuesit po e trajtonin rastin si vrasje.

Pas zbulimit të mbetjeve mortore, hetuesit krahasuan të dhënat dentare me rastet e personave të zhdukur, por nuk arritën të gjenin një përputhje. Çështja përfundimisht u mbyll për shkak të kufizimeve në teknologjinë mjeko-ligjore.

Në vitin 2010, një antropolog shtetëror e rihapi çështjen dhe i dorëzoi dhëmbët e viktimës për testimin e ADN-së, por nuk u gjet asnjë përputhje pozitive.

Katërmbëdhjetë vjet më vonë, ekipi hetimor i çështjes i udhëhequr nga hetuesi special Andy Murr, e rishikoi çështjen përsëri, këtë herë duke përdorur mjete më të përparuara mjeko-ligjore.

Duke bashkëpunuar me zyrën e mjekut ligjor, Murr përcaktoi se çështja ishte e përshtatshme për testim të avancuar të ADN-së. Një laborator mjeko-ligjor testoi një mostër kockash dhe krijoi një profil ADN-je që u lejoi hetuesve të kërkonin të afërm të mundshëm.

Me ndihmën e njësisë së vrasjeve të policisë shtetërore të Maryland dhe njësisë së inteligjencës së departamentit të policisë së Raleigh, kërkimi përfundimisht i çoi hetuesit në identifikimin e viktimës si Blizzard.