Teleferiku nga Sredno Vodno deri te Kryqi i Mileniumit ende nuk funksionon, ndërsa Qyteti i Shkupit përsëri ndau mjete shtesë për rindërtimin e tij. Në seancën e sotme të Këshillit u votua një vendim me të cilin, përveç 20 milionë denarëve të miratuar më parë, sigurohen edhe 25 milionë denarë.
Kështu, shuma totale e destinuar për rindërtimin e teleferikut arriti në 45 milionë denarë.
Në arsyetimin e vendimit thuhet se mjetet shtesë janë të nevojshme për krijimin e kushteve për realizimin e aktiviteteve të rindërtimit, përmirësimin e gjendjes teknike dhe funksionale të teleferikut, si dhe rritjen e sigurisë dhe besueshmërisë gjatë përdorimit të tij.
Teleferiku nuk funksionon prej disa muajsh, pasi kryetari i Shkupit, Orce Gjorgjievski, deklaroi se kurrë nuk ishte servisuar siç duhet dhe se nuk është i sigurt për përdorim.
Vendimi shkaktoi reagime te këshilltarët e Levicas, të cilët theksuan se nuk do ta mbështesin, sepse më parë tashmë ishin miratuar 20 milionë denarë, ndërsa tani shuma rritet më shumë se dyfish. Ata vunë në dukje edhe se ende nuk është zgjedhur servisuesi dhe se punët nuk kanë filluar.
Nga shumica këshilltare, nga ana tjetër, sqaruan se servisimin mund ta kryejë vetëm firma që e ndërtoi teleferikun. Ata theksuan se Qyteti duhet t’i ndihmojë financiarisht JSP “Shkupi”, e cila administron teleferikun, për shkak të gjendjes financiare të ndërmarrjes.
Në seancë nuk u dha përgjigje se pse rindërtimi dhe servisimi i teleferikut ende nuk kanë filluar, edhe pse për këtë qëllim deri tani janë ndarë gjithsej 45 milionë denarë.
Burimi: lajmpress.org
