Dy anije arrijnë të kalojnë në Ngushticën e Hormuzit

Të dhënat e gjurmimit të anijeve nga MarineTraffic tregojnë se dy anije mallrash kanë nisur lëvizjen nga Ngushtica e Hormuzit dhe janë duke hyrë në Gjirin e Omanit, në një periudhë kur trafiku detar në këtë zonë mbetet ende i ulët.

Sipas BBC, njëra prej anijeve, me emrin “Blue Ocean 1” dhe me flamur të Komoreve, ka qenë pjesërisht e ngarkuar gjatë kalimit nëpër ngushticë.

Gjithashtu, sistemi i saj i transmetimit të vendndodhjes është fikur për një periudhë gjatë tranzitit, por është riaktivizuar sërish ndërsa anija i është afruar daljes nga ngushtica.

Sipas të dhënave të MarineTraffic, kjo anije ishte ndalur më herët në zonat e ankorimit iranian në muajin maj, bazuar në regjistrat e thirrjeve në porte.

Ndërkohë, një anije e dytë mallrash me emrin “Kaiser” kishte tentuar të kalonte përmes Ngushticës së Hormuzit më 12 qershor, por ishte detyruar të kthehej prapa për arsye që nuk janë bërë ende të ditura.

Megjithatë, sipas të dhënave më të fundit, kjo anije po e kalon sërish ngushticën, këtë herë me ngarkesë.

Të dyja anijet raportohet se kanë si destinacion portin e Soharit në Oman.

Sipas kompanisë së inteligjencës detare Windward, trafiku në Ngushticën e Hormuzit ka mbetur i kufizuar gjatë javës së fundit, me vetëm dy deri në pesë kalime anijesh në ditë.

Kjo shifër është dukshëm më e ulët krahasuar me periudhën para fillimit të tensioneve, kur përmes ngushticës kalonin mbi 100 anije çdo ditë.