Avioni me të cilin po udhëtonte presidenti ukrainas Volodymyr Zelensky drejt Oslos mësohet se është përballur me një situatë të rrezikshme, pasi një dron ishte pranë tij gjatë fluturimit, bëri të ditur sot kryeministri norvegjez Jonas Gahr Store.
Incidenti dyshohet se ka ndodhur dje në mbrëmje, ndërsa Zelensky po udhëtonte nga Moldavia drejt kryeqytetit norvegjez për të marrë pjesë në ceremoninë mortore të mbretit të ndjerë Harald V.
“Ky është realiteti në të cilin ai gjendet”, tha Store, sipas transmetuesit norvegjez NRK.
Kryeministri norvegjez nuk dha detaje të tjera mbi incidentin.
Autoritetet ukrainase dhe vetë Zelensky nuk kanë komentuar deri tani mbi ngjarjen.
Sipas Store, gjatë takimit sot në mëngjes, presidenti ukrainas i kishte thënë se nuk kishte bërë një gjumë të mirë gjatë natës.
Situata ishte veçanërisht dramatike, pasi Zelensky kishte qëndruar në telefon duke marrë raporte të vazhdueshme mbi sulmet me raketa në Ukrainë.
Ndërkohë, Instituti për Studimin e Luftës (ISW) raportoi se një dron rus kishte fluturuar dje për rreth një orë në hapësirën ajrore të Moldavisë dhe Rumanisë.
Sipas ISW, ministritë e Mbrojtjes të Moldavisë dhe Rumanisë thanë se një dron “Shahed” kishte hyrë në hapësirën ajrore moldave nga Ukraina, kishte vazhduar drejt Rumanisë dhe më pas ishte kthyer në Moldavi, ku përfundimisht u rrëzua.
Megjithatë, nuk është konfirmuar nëse bëhet fjalë për të njëjtin dron që përmendi kryeministri Store.
Për momentin, rrethanat e sakta të incidentit dhe distanca nga avioni i Zelenskyt mbeten të paqarta.
Burimi: botasot.info
