Dortmundi konfirmon se do ta ‘dënojë’ Adeyemin, pas sjelljes së tij në ndeshjen e fundit

Drejtori sportiv i Borussia Dortmundit, Sebastian Kehl, ka konfirmuar se Karim Adeyemi do të ndëshkohet pas reagimit të zemëruar ndaj zëvendësimit të tij gjatë fitores 2-0 të BVB-së në Bundesliga kundër Borussia Mönchengladbach.

Karim Adeyemi u zëvendësua në minutën e 60-të të ndeshjes ndaj Borussia Mönchengladbach dhe reagoi me nervozizëm të madh, duke tentuar të shkonte drejt tunelit, përpara se të ndalohej në vijën anësore nga Sebastian Kehl.

Duke folur për “Sky Germany” pas ndeshjes, Kehl e bëri të qartë se klubi nuk do ta tolerojë një sjellje të tillë.

“Do të duhet të flasim për incidentin,” tha Kehl. “Ai do të marrë një gjobë, sepse kjo është diçka për të cilën kemi diskutuar shumë intensivisht me ekipin gjatë javëve të fundit”, shtoi ai.

Kehl mbrojti gjithashtu vendimin për zëvendësimin e sulmuesit, duke këmbëngulur se ai ishte i justifikuar bazuar në paraqitjen e tij.

“Zëvendësimi ishte plotësisht i arsyeshëm,” shpjegoi ai. “Karim nuk luajti mirë sot. Ky lloj reagimi nuk është diçka që trajneri dëshiron ta shohë; nuk është diçka që askush dëshiron ta shohë. Nuk është i pranueshëm dhe Karim e di këtë”, u shpreh ai.

Si pasojë, Dortmundi do t’i shqiptojë Adeyemit një ndëshkim financiar.

Incidenti vjen pas një sërë reagimesh të ngjashme nga reprezentuesi gjerman javët e fundit. Edhe trajneri Niko Kovac e kritikoi Adeyemin pas ndeshjes, duke përsëritur vlerësimin e Kehlt.

“Ai nuk ishte i mirë sot, prandaj zëvendësimi ishte i justifikuar,” tha Kovac.

Trajneri i Dortmundit mbështeti gjithashtu vendimin e klubit për ta disiplinuar lojtarin, duke shtuar: “Duhet të tregosh mirëkuptim në situata të tilla.”

Fitorja e Dortmundit ndaj rivalëve Gladbach i ndihmon ata të vazhdojnë ndërtimin e momentumit në Bundesliga përpara pushimit dimëror, por incidenti i jep një nuancë negative një mbrëmjeje që në përgjithësi ishte pozitive për BVB-në.