Një dasmë në Ohio të Shteteve të Bashkuara është kthyer në një skenë kaosi, pasi një konflikt mes dy familjeve ka degjeneruar në përleshje dhe kërcënime me thikë.
Ngjarja ndodhi gjatë ceremonisë së dasmës, ku një mosmarrëveshje mes të ftuarve u përshkallëzua brenda restorantit. Sipas policisë, një prej personave të përfshirë dyshohet se mori një thikë nga tavolina dhe filloi të kërcënonte të pranishmit.
Një video e publikuar nga autoritetet tregon momentet e tensionit, ndërsa të ftuarit largohen me nxitim nga salla dhe dalin të panikosur në parking.
Sipas raportit policor, 46-vjeçari Raed Mahmoud Suleiman dyshohet se ishte personi që mori thikën. Në pamjet e incidentit, një nga të pranishmit shihet duke hedhur një karrige drejt tij në përpjekje për ta ndaluar.
“Ai shkoi një hap më tej dhe nxori një thikë të vërtetë dhe po kërcënonte njerëzit me të”, deklaroi shefi i Policisë së Westlake, Jerry Vogel.
Kur policia mbërriti në vendngjarje, rreth 40 persona ishin larguar nga salla dhe ndodheshin në parking, duke u përpjekur të largoheshin nga situata e dhunshme.
Tre persona mbetën të plagosur gjatë përleshjes, ndërsa policia arrestoi Suleimanin dhe dy burra të tjerë. Suleimani përballet me akuza për sulm, shkaktim paniku dhe manipulim provash, pasi dyshohet se hodhi thikën përpara mbërritjes së policisë.
Hetuesit dyshojnë se konflikti lidhet me një përplasje të hershme mes dy familjeve, të cilat zakonisht nuk takohen me njëra-tjetrën. Prania e tyre në të njëjtën dasmë dyshohet se ka rikthyer tensionet e vjetra.
Autoritetet amerikane po vijojnë hetimet për të përcaktuar rrethanat e plota të incidentit dhe rolin e secilit prej personave të përfshirë.
Burimi: botasot.info
