Dasma e njeriut të katërt më të pasur në botë, sa është pasuria e Jeff Bezos?

Këtë javë, qyteti magjik i Venecias është kthyer në epiqendrën e vëmendjes globale, pasi Jeff Bezos dhe e fejuara e tij Lauren Sanchez po martohen në një ceremoni që tashmë po cilësohet si “dasma e shekullit” – edhe pa u zbuluar ende të gjitha detajet.

Ky event luksoz, që po zhvillohet në një prej qyteteve më romantike të botës, ka tërhequr vëmendjen jo vetëm për vendndodhjen e tij mahnitëse dhe listën e të ftuarve plot yje, por edhe për shifrat marramendëse që po shpenzohen.

Përveçse është në qendër të vëmendjes për dasmën e tij luksoze me Lauren Sanchez Jeff Bezos mbetet një figurë dominuese edhe në listat e pasurisë globale.

Themeluesi i gjigantit teknologjik Amazon dhe i kompanisë hapësinore Blue Origin, është një nga njerëzit më të pasur në planet.

Sipas të dhënave më të fundit të publikuara nga revista Forbes, pasuria e tij kap shifrën e 226.7 miliardë dollarëve, duke e renditur si njeriun e katërt më të pasur në botë.

Në krye të listës qëndron rivali i tij më i madh në sektorin teknologjik, Elon Musk, pasuria e të cilit vlerësohet të jetë rreth 412.1 miliardë dollarë.

Dasma e Jeff dhe Lauren është përgatitur me një nivel të paprecedentë luksi e organizimi, ndërsa të ftuarit do të qëndrojnë në hotelin super-ekskluziv Aman Venice, me dhoma që variojnë nga 2,000 deri në 10,000 dollarë për natë.