Presidenti i Këshillit Evropian, Antonio Costa, ka deklaruar se qytetarët evropianë presin që samiti i NATO-s në Ankara të dërgojë një mesazh të qartë se aleanca mbetet themeli i mbrojtjes dhe parandalimit të Evropës.
Në një deklaratë të përbashkët me sekretarin e përgjithshëm të NATO-s, Mark Rutte, dhe presidenten e Komisionit Evropian, Ursula von der Leyen, Costa theksoi se siguria e kontinentit vazhdon të mbështetet në partneritetin e fortë transatlantik.
Ai u shpreh se Evropa po merr përgjegjësi gjithnjë e më të mëdha për mbrojtjen e saj, ndërsa shtetet anëtare po përmbushin angazhimet për rritjen e kapaciteteve ushtarake.
Nga ana tjetër, Ursula von der Leyen ritheksoi se “një Evropë e fortë është një NATO e fortë”, duke bërë të ditur se Bashkimi Evropian synon të mobilizojë deri në 800 miliardë euro deri në vitin 2030 për të forcuar industrinë evropiane të mbrojtjes.
Ndërkaq, Mark Rutte theksoi ndarjen e qartë të përgjegjësive mes NATO-s dhe Bashkimit Evropian. Sipas tij, NATO fokusohet në aftësitë ushtarake, standardet dhe strukturën e komandës, ndërsa BE-ja mbështet zhvillimin e industrisë së mbrojtjes, infrastrukturën, financimin dhe forcimin e qëndrueshmërisë së vendeve anëtare.
Burimi: botasot.info
