Nënkryetarja e Partisë Demokratike të Kosovës (PDK), Vlora Çitaku, ka reaguar fuqishëm në mbështetje të protestës së paralajmëruar të studentëve shqiptarë në Shkup, e cila do të mbahet të hënën, më 18 Maj.
Përmes një postimi në rrjetet sociale, Çitaku e ka cilësuar këtë organizim si një betejë legjitime për të drejtat më themelore njerëzore dhe kombëtare, me fokus të veçantë mbrojtjen dhe respektimin e gjuhës shqipe.
“E paimagjinueshme që në vitin 2026 të luftohet për të drejtat bazike”
Ish-ambasadorja dhe deputetja e PDK-së ka shprehur keqardhjen që në një shtet anëtar të NATO-s, siç është Maqedonia e Veriut, shqiptarëve ende u duhet të dalin në rrugë për të mbrojtur identitetin dhe dinjitetin e tyre.
“Nesër, më 18 Maj, studentët shqiptarë protestojnë në Shkup. Protestojnë për të drejtën më themelore njerëzore dhe kombëtare, për gjuhën shqipe, për gjuhën amtare. Është e paimagjinueshme që në vitin 2026, në një shtet anëtar të NATO, të duhet ende të luftohet për të drejta bazike, për identitet, për dinjitet”, ka shkruar Çitaku.
Studentët – Motori i ndryshimeve të mëdha
Çitaku ka kujtuar se historikisht, kthesat e mëdha dhe përmbysjet e sistemeve të padrejta gjithmonë kanë filluar nga guximi i rinisë dhe studentëve që refuzojnë të heshtin. Ajo ka përcjellë një mesazh të qartë dhe të prerë sa i përket pozicionit të shqiptarëve në rajon:
“Shqiptarët në Ballkan nuk janë mysafirë askund. Janë autoktonë. Janë në trojet e veta. Studentë, jemi me ju”, ka përfunduar nënkryetarja e PDK-së.
Protesta e studentëve shqiptarë në Shkup pritet të mbledhë një numër të madh të rinjsh nën moton “Bashkohuni me studentët – Të gjithë një zëri”. (INA)
Burimi: lajmpress.org
