Burri nga India dogji për së gjalli gruan, mendonte se kishte lëkurë shumë të errët – gjykata e dënon me vdekje

Një gjykatë në Indi i ka dhënë dënimin me vdekje një burri për djegien për së gjalli të gruas së tij, shkak të ngjyrës së lëkurës së saj.

Në deklaratat e saj para vdekjes, Lakshmi kishte thënë se burri i saj Kishandas “e tallte rregullisht për shkak se ishte me lëkurë të errët”, transmeton Telegrafi.

Gjyqtari i qarkut Rahul Choudhary në qytetin verior të Udaipur shpjegoi dënimin me vdekje, duke thënë se vrasja binte në kategorinë e “më të rrallave të të rrallave” dhe ishte “një krim kundër njerëzimit”.

Avokati i Kishandas i tha BBC-së, se klienti i tij ishte i pafajshëm dhe se ata do të apelonin kundër urdhrit.

Vrasja e Lakshmit tetë vjet më parë dhe vendimi, i dhënë në fundjavë, kanë bërë bujë në një vend ku obsesioni publik me ngjyrosjen është i dokumentuar mirë.

Sulmi ndaj Lakshmit ndodhi natën e 24 qershorit 2017, sipas urdhrit të gjykatës të parë nga BBC.

Vendimi citon deklaratat që ajo dha para vdekjes së saj para policisë, mjekëve dhe një magjistrati ekzekutiv.

Lakshmi tha se burri i saj shpesh e quante “kali” ose lëkurë të errët dhe trupi e turpëronte që nga martesa e tyre në vitin 2016”.

Natën që ajo vdiq, Kishandas kishte sjellë një shishe plastike me një lëng ngjyrë kafe – ai tha se ishte një ilaç për ta bërë lëkurën e saj më të çelët.

Sipas deklaratave, ai e aplikoi lëngun në trupin e saj dhe kur ajo u ankua se kishte erë acidi, ai i vuri flakën me një shkop temjani.

Kur trupi i saj filloi të digjej, ai derdhi pjesën tjetër të lëngut mbi të dhe iku me vrap.

Prindërit dhe motra e Kishandas e çuan atë në spital ku ajo vdiq më vonë.

“Nuk do të jetë ekzagjerim të thuhet se ky krim brutal që të copëton zemrën nuk ishte vetëm kundër Lakshmi, por është një krim kundër njerëzimit”, tha gjykatësi Choudhary në urdhrin e tij.

Kishandas, tha ai, “i theu besimin” dhe tregoi “mizori të tepruar duke i hedhur lëngun e mbetur” ndërsa ajo digjej.

“Është një krim që trondit ndërgjegjen e njerëzimit, gjë që as nuk mund të imagjinohet në një shoqëri të shëndetshme dhe të civilizuar”, shtoi urdhri.

Prokurori publik Dinesh Paliëal e përshkroi urdhrin si “historik”, dhe i tha BBC-së se shpresonte se do të shërbente si “një mësim për të tjerët në shoqëri”.