Shqipëria feston një tjetër sukses të madh sportiv.
Çermen Valiev ka arritur të ngjitet në podiumin e Botërorit të Mundjes, që po zhvillohet në Kroaci, duke fituar medaljen e argjendtë në peshën deri 74 kg.
Mundësi kuqezi u ndal vetëm në finale nga japonezi Takashai, i cili triumfoi me rezultatin 8-2.
Pavarësisht humbjes, arritja e Valiev është mjaft e rëndësishme, duke konfirmuar nivelin e lartë dhe përfaqësimin dinjitoz të Shqipërisë në arenën ndërkombëtare.
Valiev e nisi garën një ditë më parë me një fitore të thellë 12-2 ndaj mongolit Erdenabat.
Në raundin pasues, ai eliminoi belgun Ibragim Veliev, për të siguruar më pas një çerekfinale dramatike ndaj amerikanit David Aron, të cilin e mundi 7-5.
Në gjysmëfinale, shqiptari arriti të triumfonte 6-4 ndaj rusit Sidakov, duke siguruar kështu një vend në finalen e madhe.
27-vjeçari Valiev nuk është emër i panjohur për sportdashësit shqiptarë, pasi mbahet mend si sportisti që i solli vendit tonë medaljen e parë olimpike në histori.
Tashmë, ai shton edhe një tjetër sukses madhor, duke i dhuruar Shqipërisë një medalje të çmuar në Botërorin e Kroacisë.
Burimi: botasot.info
