Bllaca largohet nga Gjilani pas gati një dekade

Portieri Aridon Bllaca ka konfirmuar ndarjen me klubin e futbollit Gjilani, duke i dhënë fund një kapitulli që zgjati pothuajse dhjetë vjet.

Gardiani e bëri të ditur vendimin përmes një postimi emocional në rrjetet sociale, ku theksoi se largimi vjen si pjesë e një hapi të rëndësishëm për vazhdimin e karrierës së tij.

Bllaca iu bashkua Gjilanit në moshë të re dhe u largua si një nga figurat më të qëndrueshme të skuadrës ndër vite.

Në mesazhin e tij, ai falënderoi drejtuesit e klubit, trajnerët, bashkëlojtarët, stafin dhe tifozërinë “Skifterat”, të cilët i cilësoi si mbështetje konstante që nga dita e parë.

Portieri u shpreh se do t’i mbajë me vete momentet më të bukura me fanellën kuqebardhë dhe nuk përjashtoi mundësinë që rrugët me Gjilanin të kryqëzohen sërish në të ardhmen.