Deputeti i Partisë Demokratike, Tritan Shehu, ka votuar në procesin për zgjedhjen e kryetarit të ri të Kuvendit, pavarësisht vendimit të grupit parlamentar të PD-së për të bojkotuar votimin.
I pyetur nga gazetarët pas daljes nga seanca e parë e Legjislacionit të ri, Shehu tha:
“Votova kundër, ishte thjesht refleks. Refleksi i votimit.”Kjo lëvizje e Shehut nxjerr në pah paqartësi brenda vetë PD-së. Kryetari i saj, Sali Berisha, u shpreh se ndoshta ka pasur një keqkuptim në komunikimin e brendshëm të grupit.
“Do flas me zotin Shehu. Ka mundësi që mesazhi në grupin e WhatsApp të mos jetë kuptuar siç duhet,” u shpreh Berisha, duke lënë të kuptohet se vota e Shehut nuk ishte në përputhje me qëndrimin e grupit.
Ndërkohë, shumica e deputetëve të Partisë Demokratike bojkotuan procesin, duke refuzuar të marrin fletën e votimit dhe duke hedhur pankarta proteste në kutinë e votimit.
Sakaq, Niko Peleshi u zgjodh Kryetari i Kuvendit, me 84 vota të mazhorancës, ndërkohë që 3 vota të tjerë ishin kundër, mes tyre edhe ajo e Tritan Shehut.
Burimi: botasot.info
