Deputeti i VLEN-it, Bekim Sali, ka marrë pjesë sot në një panel-diskutim për drejtësi dhe dije, të organizuar nga Medreseja “Isa Beu” në Shkup, ku foli për rëndësinë historike dhe juridike të këtij institucioni dhe për përpjekjet që u bënë për njohjen e plotë të tij në sistemin arsimor të vendit.
“Sot, së bashku me kryetarin e Alternativës dhe njërin prej liderëve të VLEN, Zeqirija Ibrahimi, kandidatin për kryetar të Komunës së Çairit nga radhët e VLEN, Izet Mexhiti, zëvendësministrin e Arsimit dhe Shkencës, Lulzim Aliu, mora pjesë në panel-diskutimin për drejtësi dhe dije ‘Medreseja Isa Beu – një histori suksesi’”, ka shkruar Sali në një status në Facebook.
Ai theksoi se rrugëtimi historik dhe juridik i këtij institucioni ka kaluar nëpër sfida të mëdha dhe përplasje të motivuara nga interesa të ngushta politike.
“Me insistimin e vazhdueshëm të liderit të Alternativës dhe njërit prej liderëve të VLEN, Zeqirija Ibrahimi, sot kemi ligj për medresenë dhe nxënësit e kësaj shkolle janë të barabartë me nxënësit tjerë”, deklaroi Sali, duke e cilësuar këtë si “fundin e një padrejtësie të madhe historike që iu është bërë këtij institucioni arsimor”.
Ai shprehu krenarinë e tij për arritjen dhe për faktin që Medreseja “Isa Beu” tashmë konsiderohet një histori suksesi.
Burimi: alfax.mk
