Akademiku Artan Fuga ka reaguar me tone të ashpra në rrjetet sociale pas lajmit se Presidenca i ka dërguar një shkresë Gjykatës Kushtetuese, duke i kërkuar të shpallë moskompetencën për çështjen “Veliaj” dhe të caktojë datën e zgjedhjeve në Tiranë.
Në një postim ironik e kritik në Facebook, Fuga e cilëson këtë veprim si një presion të paprecedentë ndaj drejtësisë dhe një cenim të pavarësisë së Gjykatës Kushtetuese, duke e quajtur situatën “të pabesueshme” dhe “kundër logjikës kushtetuese”.
“Presidenca godet me shkresë Gjykatën Kushtetuese!
Të shpëtojë kush të mundet!
Lexova në media se institucioni i Presidencës që drejtohet nga z. Bajram Begaj i paska shkruar një letër gjykatës kushtetuese ku i kërkon të shpallin moskompetencën e gjykimit të çështjes Veliaj dhe të caktohet data e zgjedhjeve për Tiranën.
Pickova kokën se mos isha në ëndërr!
A e dinë në Presidencë se Gjykata Kushtetuese është pushtet më vete që nuk varet nga presidenti që nga koha e të ndjerit Haxhi Lleshi!
Seç mu kujtua edhe Haxhi Qamili!
Si mund t’i drejtohet presidenca me letër urdhëruese gjykatës kushtetuese.
Unë e di që gjykata kushtetuese gjykon edhe presidentin, jo presidenti t’i japë rekomandime gjykatës kushtetuese!
Apo jo o qytetarë të nderuar!
Nuk parashikohet besoj që presidenti të hedhi në gjyq gjykatën kushtetuese për vendimin e gjykatës kushtetuese dhe pastaj gjykata kushtetuese të gjykojë gjykatën kushtetuese!
Më falni po kjo letër a nuk është një presion ndaj drejtësisë nga ana e presidencës? A nuk është një intimidim ndaj gjykatësve që ndëshkohet me ligj?
Unë them po!
Dhe pastaj thuhet se do të mbrohen gjykatësit! Ata sulmohen në mes të ditës me shkresë!
A e kupton z. President që sekretarja e tij e përgjithshme duke vepruar ndoshta pa dijeninë e tij, ndoshta – them – ka hedhur në erë kushtetutën? A e kupton se pas krahëve të tij, ndoshta them, tani çdo vendim i gjykatës do të shihet me mosbesim? Sikur gjykata të vendosi ta shpallë veten jokompetente do të thuhet se zbatoi urdhërin e presidencës!
E kupton se ka hedhur në erë besimin te gjykata! Dhe vetë lirinë e gjykatës për ta gjykuar çështjen!
Uroj që media që e ka botuar këtë lajm të mos jetë e mirëinformuar ose t’ja fusi kot!
Por, vërtet si qytetar jam krejt i habitur!
Sa të ligj këta të medias, gënjejnë ditën për diell, se nuk ka mundësi që presidenca ta ketë bërë një budallik të tillë! Nuk e besoj kurrë.
Atje ka juristë të zotë!”, shkruan akademiku Artan Fuga.
Top Channel
Burimi: top-channel.tv
