Procesi për zgjedhjen e Avokatit të Popullit mbetet i bllokuar në Kuvend. Edhe pse në takimin e liderëve kishte një dakordësi parimore që BDI të siguronte shumicën e Badenterit për kandidatin Faton Selami, pas takimeve të mëvonshme në Kuvend, partia është rikthyer në qëndrimin fillestar, nuk do të japë pëlqimin dhe kërkon tërheqjen e kandidatit, informon PressOnline.al
Nga BDI bëjnë të ditur se ndryshimi i qëndrimit ka ardhur pasi kanë kuptuar se të punësuarit në institucionin e Avokatit të Popullit kanë marrë pagat e tyre. Sipas tyre, kjo e bën të panevojshme zgjedhjen urgjente të Selamit dhe kërkohet një kandidat i ri. BDI propozon që Komisioni për Zgjedhje dhe Emërime të dalë me një emër tjetër nga lista e kandidatëve të paraqitur tashmë, pa hapur konkurs të ri, për të shmangur humbjen e kohës.
Sipas burimeve partike të PressOnline.al, arsyeja kryesore e mosdhënies së pëlqimit për Selamin është fakti se ai konsiderohet kandidat i mbështetur nga VLEN, ndërsa Avokati i Popullit, sipas BDI-së, duhet të jetë figurë plotësisht politike e pavarur.
Ndërkohë, problemi nuk lidhet vetëm me pagat. Institucioni i Avokatit të Popullit prej më shumë se gjashtë muajsh funksionon me kapacitete të kufizuara, çka po dëmton seriozisht rolin e tij kushtetues. Të punësuarit kanë marrë pagën e dhjetorit, e parashikuar në buxhetin e vitit 2025, por mbetet e paqartë nëse do të sigurohet pagesa e janarit nëse nuk zgjidhet Avokati i ri i Popullit.
Rezervat e BDI-së për këtë zgjedhje i ka konfirmuar publikisht edhe lideri Ali Ahmeti, në një deklaratë pas takimit të liderëve.
Siç mëson PressOnline.al, sipas bisedave joformale, në takimin e liderëve ishte hedhur edhe një kompromis: BDI të siguronte shumicën e Badenterit për zgjedhjen e Selamit, ndërsa pas gjashtë muajsh ai vetë të tërhiqej dhe të hapej procedurë e re. Megjithatë, BDI është tërhequr edhe nga kjo marrëveshje parimore.(PressOnline.al)
