Policia e Kosovës ka konfiskuar armë, qindra fishekë, radiolidhje dhe pajisje të tjera ushtarake gjatë disa bastisjeve të zhvilluara të premten në Zubin Potok.
Sipas raportit të Policisë, në një bastisje të zhvilluar dje, në shtëpinë e një të dyshuari mashkull kosovar janë gjetur dhe konfiskuar një AK-47, një revole, 446 fishekë, 42 krehër, një radiolidhje dhe pajisje të tjera ushtarake.
Sipas policisë, në një bastisje tjetër, të premten, Policia ka konfiskuar 178 fishekë të kalibrave të ndryshëm, një gazmaskë, dy radiolidhje dhe disa pajisje të tjera për armë.
Ndërkaq, gjatë kontrollit të një shtëpie të pabanuar në orën 15:50, janë gjetur 30 fishekë të kalibrave të ndryshëm dhe pesë gëzhoja të armëve të gjata.
Policia ka raportuar edhe për dy bastisje të tjera në Zubin Potok. Në shtëpinë e një të dyshuare janë gjetur dhe konfiskuar një pushkë gjuetie me leje, ndërsa në shtëpinë e një të dyshuari tjetër janë konfiskuar një pushkë gjuetie, një revole dhe dy fishekë.
Burimi: botasot.info
