Personi, i cili sipas policisë vrau një person dhe plagosi katër të tjerë gjatë një incidenti me të shtëna sot në lagjen “Logan Circle” të Uashingtonit, duket se ka qëlluar veten pasi kishte hapur zjarr ndaj oficerëve nga brenda apartamentit të tij ku ishte barrikaduar, njoftoi policia.
Negociuesit e policisë folën me personin e armatosur për një orë, në përpjekje për t’i dhënë fund përballjes së armatosur, tha Carroll, por autori hapi zjarr ndaj oficerëve.
“Pak çaste më parë, ndërsa po komunikonin me atë individ, oficerët dëgjuan një të shtënë arme. Si përgjigje, oficerët hynë me forcë në apartament. Aty gjetën të dyshuarin, i cili kishte marrë një plagë nga arma e zjarrit”, deklaroi Jeff Carroll, shefi i përkohshëm i Departamentit të Policisë Metropolitane.
“Ai qëlloi përmes derës në drejtim të oficerëve, të paktën në dy raste”, shtoi Carroll.
Autori ka vdekur si pasojë e një plage të shkaktuar nga vetja me armë zjarri, sipas burimeve nga forcat e rendit që janë në dijeni të çështjes.
Policia beson se i dyshuari i përfshirë në të shtënat në Uashington, mund të ketë pasur një konflikt që lidhet me ndërtesën e banimit ku ndodhi ngjarja.
“E kemi një ide se kush është ai. Besojmë se ka pasur një lloj konflikti që lidhet me ndërtesën e banimit, por nuk kemi shumë më tepër detaje”, tha Jeff Carroll, shefi i përkohshëm i Departamentit të Policisë Metropolitane të Uashingtonit, gjatë një konference për shtyp.
Burimi: botasot.info
