Asllani i ka idetë e qarta

Kristjan Asllani pret largimin nga Torino gjatë janarit dhe kthimin “tranzit” tek Interi.

Mesfushori i Kombëtares shqiptare do të kalojë në një skuadër tjetër, por mbetet të shihet se ku, me disa hipoteza që janë shfaqur në horizont.

Megjithatë, mediat italiane bëjnë të qartë se Asllani nuk ka ndryshuar mendje në një pikë.

Ai nuk ka ndër mend që të largohet nga Italia dhe ka refuzuar mundësinë që të luajë në një kampionat tjetër, ndonëse Interi do të preferonte që ai të shkonte në Spanjë.

Ndaj zikaltrit po përpiqen t’i gjejnë një sistemim në Itali dhe sipas mediave përtej Adriatikut, kanë një plan për ta përfshirë Asllanin si një “paketë” shkëmbimi bashkë me Stefan De Vraj. Destinacioni është Fiorentina, një klub që ka nevojë urgjente për përforcime që të dalë nga kriza dhe për t’u larguar nga fundi i tabelës.

Në anën tjetër, drejt Milanos, do të udhëtonte mbrojtësi i djathtë Dodo, emri i përzgjedhur nga Interi për t’u përforcuar pasi dështoi kthimi i Kanselos.

Palët do të nisin bisedime më konkrete në ditët në vijim, me Asllanin në pritje për të mësuar se në cilin klub italian do të mbyllë këtë sezon.