Almir Kryeziu, futbollisti i FC Ballkanit, është shpallur për herë të dytë në këtë edicion “Ylli i Javës” në Superligën e Kosovës, çmim që ndahet nga Federata e Futbollit e Kosovës në bashkëpunim me sponsorin zyrtar të Superligës, Albi Mall.
Kryeziu pati një paraqitje të shkëlqyer gjatë 88 minutave sa ishte në fushë, duke shënuar një gol dhe duke asistuar në golin e dytë, për të siguruar fitoren e FC Ballkanit kundër Gjilanit me rezultatin 1:2. Vlerësimi është bërë nga Komisioni i Veteranëve të Futbollit.
“Kemi pasur një fazë përgatitore shumë të mirë dhe kemi pasur kohë të mjaftueshme për ta analizuar Gjilanin. Ekipi ka qenë shumë i mirë edhe në sezonin e kaluar, megjithatë këto transfere kanë rritur konkurrencën, por edhe kualitetin në ekip”, ka thënë Kryeziu për faqen zyrtare të FFK-së.
“Synimi i FC Ballkanit është dalja kampion dhe jemi në rrugën e mirë për ta arritur këtë, por jemi edhe në garë për Kupën e Kosovës, andaj do të luftojmë në të dyja garat. Falënderoj Federatën e Futbollit të Kosovës për vlerësimin si më i miri i xhiros, si dhe bashkëlojtarët dhe stafin e trajnerëve, sepse pa ta kjo performancë nuk do të ishte e mundur”, ka pohuar ai.
Burimi: botasot.info
