Aktori Russell Brand u dënua të hënën me 10 vjet e gjashtë muaj burgim për përdhunimin e një gruaje dhe sulmin seksual ndaj tri të tjerave, në një periudhë kur karriera e tij në komedi ishte në ngritje.
Gjykatësi Joel Bennathan tha se Brand kishte treguar “shpërfillje të vazhdueshme dhe arrogante” ndaj grave.
“Rreth 20 vjet më parë, Russell Brand, ju po bëheshit i famshëm. Ishit i zgjuar dhe, në sytë e shumë njerëzve, qesharak e karizmatik. Por, gjithashtu, ishit bërë një grabitqar seksual”, tha Bennathan.
Brand shfaqi pak emocione gjatë seancës dhe, pasi u shoqërua nga zyrtarët e gjykatës, iu drejtua bashkëshortes pa zë: “Do të jemi mirë”.
Aktori dhe komediani 51-vjeçar, i njohur për paraqitjet e tij në skenë dhe emisionet televizive e radiofonike, si dhe për problemet me drogën dhe alkoolin, kishte deklaruar se ishte i pafajshëm dhe se të gjitha marrëdhëniet kishin qenë me pëlqim të ndërsjellë.
Megjithatë, juria prej tetë burrash dhe katër grash e shpalli fajtor për sulmet ndaj katër prej gjashtë grave që e akuzuan për ngjarje që datojnë që nga viti 2004. Ai u lirua nga dy akuza për përdhunim dhe një për tentim të sulmit të pahijshëm seksual.
Prokurorja Riel Karmy-Jones tha se Brand kishte keqpërdorur ndikimin dhe fuqinë që i kishte dhënë fama për të pasur qasje te gratë dhe se kjo e kishte bërë të besonte se mund të kryente vepra të tilla pa u ndëshkuar, shkruan Associated Press.
Burimi: botasot.info
