Kryetari i Bashkimit Demokratik për Integrim, Ali Ahmeti, ka njoftuar se partia shënoi 24-vjetorin e themelimit në një aktivitet të organizuar në Parkun e Qytetit në Shkup, ku morën pjesë anëtarë, simpatizantë dhe mbështetës të saj.
Sipas Ahmetit, përvjetori u festua në një atmosferë festive, pozitive dhe me energji të lartë, duke vlerësuar rrugëtimin e BDI-së gjatë më shumë se dy dekadave në skenën politike të vendit.
“Për 24 vite me radhë, BDI ka përfaqësuar me dinjitet qytetarët, duke mbetur forca politike më e organizuar, më e konsoliduar dhe më e etabluar në vend”, theksoi Ahmeti.
Ai shtoi se partia vazhdon të mbetet besnike ndaj misionit me të cilin u themelua, duke e cilësuar BDI-në si “zërin autentik të shqiptarëve dhe të gjithë qytetarëve që besojnë në barazi, demokraci dhe integrim”.
Në mesazhin e tij, Ahmeti vlerësoi se arritjet më të rëndësishme të shtetit mbajnë vulën e angazhimit të BDI-së, ndërsa shprehu bindjen se sfidat aktuale do të tejkalohen përmes unitetit dhe vendosmërisë.
“Edhe sfidat dhe përballjet e sotme, të cilat me të drejtë ngjallin shqetësim, do t’i tejkalojmë së bashku, me unitet dhe vendosmëri, duke e rikthyer Maqedoninë e Veriut në rrugën e sigurt drejt vlerave perëndimore dhe integrimit euroatlantik”, deklaroi Ahmeti.
Në fund, kreu i BDI-së uroi të gjithë anëtarët, simpatizantët dhe mbështetësit e partisë me rastin e 24-vjetorit të themelimit të saj.
Burimi: alfax.mk
